كان يوم ميتنسيش من ذاكرة الكرة المصرية
اليوم هو السبت الموافق 14 . 11 .2009
المكان : بيتنا الكائن بشارع بلبول برشوم الصغري .
الساعة : السابعة والنصف مساءا ، عقب صلاة العشاء .
الحدث : مبارأة مصر والجزائر ، تصفيات كأس العالم 2010
مثل أي مصري ، كنت أجلس أنتظر بداية المبارأة منذ التاسعة صباحا ، كان اليوم طويل والوقت يمر ببطء ، حتي حانت السابعة والنصف ، ليطلق الحكم الجنوب أفريقي صافرة بداية مبا{اة مصر والجزائر .
لقد كنا مجموعة كبيرة من أصدقائي ، زكريا ومحمد رأفت ، محمد نجاح ، ومحمد محيي ، ونادر نجاح ، وسالم علي ، ومحمود ابراهيم ، وحمادة صابر ، وسامح حسن ، وأحمد ابراهيم ، وأحمد محمد قطب ، وأيمن صابر ، واسلا أخويا ، ومحمود أخويا ، والحاج نجاح والدي .
الكل يشاهد المبارأة بترقب شديد .
بدأ الماتش ، كل واحد حط ايده علي قلبه ، كرة سريعة في الدقيقة التانية ، الكل قام وقف ، حط ياد ، يا لهووي ، يا ابن ال.... يلاه ياعمرو ، جووووووووووووووووووووووووووووووووووووووووول .
ده بالضبط اللي حصل في الجول الاول .
عدي عشر دقايق ، يلاه ياجماعة الجول التاني بأه ، وكل واحد عامل فيها فرقوق ، لا لسة هنجيب كتير ، وحمادة ايفا عامل نفسه دونجا ويقولك احما لو طلعنا اقل من خمسة الشوت الاول ، يبقي انا معرفش حاجة ، طب يا عك حمادة قول التاني الاول .
في العشر دقايق التانيين كان فيه هجمة زي اللي جه من الجول بالضبط ، مش عاوز أقول ليكم علي اللي حصل ، حط يالاه ، حط يالاه ، الله يخرب بيت ............. ، طبعا بأه أنتم عارفين لتفعالات مشجعي الكورة ببرشوم
خاص الشوط الاول بدري بدري .
استاد بيتنا باه ، اللي فيه كم المحللين اياهم اللي انا ذكرتهم ، تحس فيهم فاروق جعفر ومحسن صالح والشاذلي وعبد الغني وشوبير ، واحد يقول بركات هينزل يكسر الدنيا ، والتاني يقولك لا لازم ينزل متعب ، طيب يطلع زيدان ولا ذكي ، ياعم ذكي مين وزيدان مين طول ما يطلعوش ، بص طلع المحمدي ، طيب ما يطلع حمص ؟؟؟؟؟
المهم اننا عملنا ييجي سبع تغيرات واحنا في البيت .
البدأ الشوط التاني ، والربع ساعة اللي في الاول ، مش عاوز أقولكم كم الشتيمة اللي خدها لعيبة المنتخب ، والحاج بأه قاعد والعيال عادي ولا حد عامل اعتبار .. هههههههههههه
وشتيمة بأه من اللي عينك تحبها ، وبصراحة أنا كنت منفعل أوي أوي أوي في الفترة دي .
طلع حمص ونزل بركات ، وعلي رأي الثلاثي شالو ألدو وجابو شاهين .
دخلنا في نص ساعة والعملية متبشرش ، بصراحة الاحباط بدأ ينزل علي الكل ، وأنا جاتلي حالة كبت وقعدت مش عاوز اتكلم ، وبصراحة كلنا بدانا تفقد الامل ، وبدأنا نشك اني الجزاير ممكن نجيب جول .
طلع عمر ونزل متعب ، شوية قالو ليه وشوية قالو عادي .
جت كورة لمتعب ضيعها ، وكل ما يضيعو كورة تلاقي الصوات والشتيمة .
لحد ما الكورة بتاع الجول جت ، ويا لهوووووووووووووووووووووووووووووووووووووووي .
مش علي الجول علي الانتريه بتاعنا اللي كان هيتكسر ، والتلايقزيون اللي كان هيطير من مكانه ، والبيت اللي كان هيقع من الهيصة اللي عملوها .
بس بجد أنا جتلي حالة هستريا ، قعدت أقول جول جول جول لخمس دقايق وانا عمال اقول كدة وعمال أرزع في الانتريه ، لحد ما واحد ابن حلال راح مديني بكس في وشي طير النظاررة ، وانا من غير النظارة نص انسان ......ههههههههههههههههههههه
عقبال ما لبست النظارة كانت الهجمة الاخيرة بتاع بركات ، الحكم صفر وقعدنا نرقص ونهيص ، لما صوتنا راح .خرجنا في الشارع وقعدنا نغني وطلعنا علي الحاج عبد العال جبنا الطبلة وقعدنا ننغني ونرقص ونشجع ، لما البراشيم كلها خرجت ترقص وراانا .
بجد يوم من أجنل أيام حياتي ، معتقدش اني ممكن أنساه خالص ، خاصة الجول بتاع متعب ده .
يارب تدوم أفراحنا وتخلي كل أيام أفراح و أعياد .
وفازت الارادة مصر وانهزم كبرياء الجزائر
وتحية لمنتخب الساجدين .
الأحد نوفمبر 15, 2009 12:46 pm
