قصيده مهداه للرجل الغامض بسلامته

اهداء خاص للرجل الغامض بسلامته

عملولك تاريخ وكأنك مش بشر
ما انت اللى حاربت وانت اللى انتصرت
وانت المهدى وجمال المنتظر
احنا احنا القضاء والقدر
متشغلش نفسك بينا
يعنى اية شعب؟
يعنى شوية حجر
على شوية شجر
تقدر تقول سيادتك
شوية بقر
احنا ياريس احنا حصانك
احنا مخلوقين عشانك
اوعى تفكر فينا ولا تشغل بالك
اغسل ايديك مننا
احنا ذنبا على جنبا
احنا مين احنا
علشان تتكلم عننا
وكتر الف خيرك
اية يعنى لما تجيب جمال
واية يعنى لما تحبس العيال
واية يعنى لما تركبنا ونقول كمان
قال مش عجبهم المحاكم العسكرية
وبيطلبوا بالديمقرطية
طيب ما احنا شعب غشيم
واللى بيفهم فينا بهيم
ما انت ياريس صاحب الطلعتين
الطلعة الجوية والطلعة البهية
وفيها اية لما تعدل الدستور
وفيها اية لما يضيع عمرنا فى طبور
وفيها اية طب ما احلى بنى ادام من الشعب
ان راح ولا جة طنبور
واية يعنى لما تسيطر على الجوامع والجامعات
واية يعنى انتخابات ومعدش فاضل كمان الا المحليات
واية يعنى لما تعاقب القضاة
معاك انت النجاة
واية يعنى صفر المنديال
واية يعنى حقوق انسان
واية يعنى لما تحبس الاخوان
واية يعنى لما تعين المعيد والعميد
طب ما الناس اسياد وعبيد
واية يعنى لما تكوينى بالحديد
دا حتى جسمنا ايربرب ويزيد
واية يعنى لما تحبس الصحافين
مهما فى الاصل شوية كدابين
واية يعنى لما تعوس وش الشعب طين
واية يعنى لما تدفنا واحنا عايشين
واية يعنى تلفيق التهم واية يعنى معتقلين
واية يعنى لما فى المطار اول كلمة تنقال
المصريين على جنب
المصرى راح ولا جة ابن كلب
واية يعنى بلد بتتسرق
واية يعنى بلد بتتحرق
واية يعنى كام عمارة بتقع
واية يعنى كام الف مشروع فشل
واية يعنى لو الشعب انتحر
واية يعنى خطط خمسية
واية يعنى جامعة ويعن اية ثانوية
ويعنى اية من الاساس تعليم
دا مهما يتعلم ايطلع بهيم
ربنا يخليك لمصر
انت رمز النصر
سيبك من المعارضين
وجرايد المستقلين
ولا اقولك ياريس حطهم فى الحبس
مين اللى قال ان احنا سبع تلاف سنة حضارة
طب فين الامارة
مين اللى قال ان احنا عندنا
هرم ونيل
انت ياريس انت الاول وانت الاخير
وفيها اية لما تلعب
جوالف ولا اسكواش
طب ما الشعب بياكل ببلاش
شعب مقرف صحيح
شعب ما يختيشيش
قال اية عايز يعيش
وفيها اية لما نوصلوا الغاز لحد تل ابيب
لمدة عشرين سنة وزيادة
دا يوم الهنا
واية يعنى لما يبقى رخيص حبتين
كويس انهم رضوا هو احنا كنا نحلموا
ومعدش فاضل الا شوية الاعتصامات
والاضرابات وقال اية بيعملوا مظاهرات
دول شوية عيال خارجين عن القوانين
والبلد تمانين مليون ودول الف ولا الفين
شوية عيال زبالة
عايزين يعملوا فى البلد حالة
وان راحوا ولاجم حشرات
حكمتك يا ريس معاهم استحملتهم ساعات
وكتر خيرك
وفى الاول والاخر الكل يتمنى رضاك
ياريس اللى تحت ارضك
واللى فوق سماك
وكل الشعب يطلع ينزل
يعيش يموت بيهواك
واية يعنى لما يبقى مهندس
قاعد ببطتين فى السوق
واية يعنى لما يبقى مدرس
شغال على توك توك بيسوق
واية يعنى لما الشعب يأكل طوب
واية يعنى لما يبقى الشعب على امرة مغلوب
انت ياريس اللى طلعتنا من المنعطف للمنحنى
وعلى رايك كنا فين وبقينا فين
وكيف كنا وكيف اصبحنا
كنا قاعدين على المصطبة بنمصوا قصب
دلوقتى لسة قاعدين بس بنمصوا حطب
واية يعنى لما يبقى فية واحد عندة
كام الف فدان
وواحد تانى بيدور على قالب طوب
يحطة تحت راسة علشان ينام
واية يعنى لما يبقى فية كام مليون حكم قضائى
بضبط واحضار
يسبوهم ويحبسوا ناس تانية
معلهاش احكام
واية يعنى لما النصب ذاد
واية يعنى لما ينتشر الفساد
بطول وعرض البلاد
واية يعنى لما يبقى الظلم عدل
والعدل ظلم
وقال بيقولوا ازاى المسئول ينام
ومعدش كمان اللى محدودين الدخل
ومعدومين الدخل واللى عايشين فى الوحل
واللى عايشين فى الترب
بيقولوا اتناشر مليون
انشالله يكونوا تلاتين
دول مش عايزين غير ضرب الصرم
ولاد الكلب ملوا البلد
واية يعنى لما يبقى فية اتنين مليون اطفال شوارع
طب وعاوزين الحكومة تعملهم اية
ولا توديهم فين
طب دول عارفوا طريقهم
انتم طريقكم فين
بتتكلموا وخلاص وكلامكم ملوش اساس
واقفين تعرضوا وقاعدين تعرضوا
وتلاقيكم كمان نايمين بالعرض
علشان لما تصحوا تعرضوا وخلاص
ما قلنا الف مرة كلامكم ملوش اساس
انا مش عارف معارضة دى ولا لحمة راس
وقال مش عجبهم الامن المركزى
ولا الامن القومى ولا البحث الجنائى
ولا الامن الغذائى ولا سجن المطار
امال ايمشى ازاى النظام
انت ياريس انت صاحب القرار
انت اللى تخلى الليل ليل والنهار نهار
انت النقطة المركزية فى الكرة الارضية
انت الاسد المغوار
واية يعنى لما يبقى عندنا كل كام شهر كام قتيل
على الحدود مع اسرائيل
طب ما دى طبيعة الحدود
مش المشكلة فى الاسرائيلين
المشكلة فى الناس اللى قاعدين على الحدود
ولا عايزين نعملوا زاى بتاع ايران وحزب الله
وكل شوية نقولوا
دولة اسرائيل ملهاش وجود
مش بينا معاهدات واتفاقيات
نموتوا احنا وهما يبنوا مستوطنات
واية يعنى لما المعبر يتقفل ويتفتح بامر من اسرائيل
انتم هبل امال عايزين الامر من مين
دا الحمد لله انهم سيبنا عايشين
وكفاية قوى انهم ما بيعملناش زى ما بيعملوا الفلسطنين
واية يعنى امين شرطة
وفيها اية لما يضربك على قفاك
امال انت مفكر القفى معمول لية
علشان ياخد مقاس ايدية
امال اية
افهم يا بجم اعرف الحكاية اية
اوعى مهما يبهدك ولا يضربك
تتهبل وترد علية؟؟؟؟؟؟؟؟؟؟؟؟

فى النهاية احب اقولك بيس عليك ياريس

بصراحة أنا مش عارفة أرد أقول إيه
غير إنى الكلام ده أقل بكتير من اللى أحنا عايشينوا
تسلم ياعمرو على الموضوع

ايه التشاؤم ده ياعمرو ، ياجماعة ادعو للريس بالهدايه .
انتم في نعمة ومش عارفين قيمتها.
كل واحد مسؤل عن نفسه وهو مسؤل عن 80 مليون
ربنا معاه ويعينه ويهديه ويغفرله

أه ويرحمه ويغفرله ويسامحه

ههههههههههه
كلنا بندعيلى من قلبنا ( بندعى عليه )

يادكتور محمد احنا مش الدولة الوحيدة فى العالم اللى 80 مليون

كفايا بس الصين اهى بقت من الخمس الكبار فى التقدم ولا الهند ولا ولا

ياعم محمد افريقيا كلها بتتقدم واحنا قاعدين بنشرب واحد شيشة لسه

امممممممممممممم
مش عارف ليه شايف ان فيها ألفاظ أوفر شوية
بس ف المجمل كويسة .

مش اقصد ياعمرو اني علشان احنا 80 مليون انه كده معذور ، اقصد اني هيتحما مسئولية 80 مليون قدام ربنا علشان كده بدعري ربنا يعينه لما يقف قدام ربنا .
اما قصة ال80 مليون ، فمحدش من البشر يملك رزق حد ، لا حسني ولا غيره
علشان كدة نقول يارب احسن
وندعي ليهم احسن ما ندعي عليهم
يمكن ربنا يستجيب لدعاء حد ويهديهم فعلا فنخلص من مشاكلنا منهم

يا جماعة والله البلد دى مش هينصلح حالها الا اذا الشعب
فاق وغير باديه الحاجات دى

اللهم اكرم الريس واديله بطيخ زى ماهو عاوز ومن غير بزر
من مقولات عادل امام (الفنان الهابط)

وشكراااااااااااااااااا ع الكلام ده

ماشى يادكتور وجهة نظر تحترم

شكرا سكاى وسموان وابو يوسف والعضو السرى على الردود

وانت ياسموان خليها عليك المرة دى بقى

» قصيده دمها خفيف