مصلحتك في عنوستك

اولا ازيكم يا بنات عاملين ايه يارب تكونوا بصحه وبخير يارب اكيد انتو بتقولوا دلوقتي ايه العبط ده ده مش عاوزنا نتجوز ولا ايه لا طبعا مش للدرجه دي ده انا والله بحبكم كلكم ونفسي كل البنات تتجوز وربنا يرزقكم بابن الحلال اللي يسعدكم ويهنيكم يارب. طبعا هتقولوا امين من غير ما اقولكم قولوا ... بس انا عاوز اقولكم ان هل الجواز ده شئ لازم نعيشه وخلاص الحقيقه انه لا لا لا لازم تعرفي ايه هدفك من الجواز وازاي تختاري زوجك ياما ناس بجد اتجوزوا ودلوقتي نادمانيين جدا انهم اتجوزوا القصه مش فستان ودي جي وشويه رقص وخلصت لا وبعدين لما تتدخلي تشوفي تعامل من زوجك زي الطين تندمي علي اللي لبسك الفستان وعلي اللي جاب الدي جي واللي خلاكي ترقصي وساعتها لازم تستحملي زوجك هو اللي هيبقي في ايده المفتاح لازم تجبري انك تتعاملي كده وده عمر مش يوم ولا يومين شفتي ان الموضوع صعب ازاي لازم تبصي شويه لقدام اصل بصي انتي كده كده هتتجوزي بكره السنه الجايه بعد خمس سنين بس المهم انك تتجوزي فعلا حد بيحبك حب مخلص هو عارف معناه وخاصه ان معظم الشباب دلوقتي بيتسلوا بمشاعر البشر حتي اصاحبهم الاولاد يبقي مش هيتسلوا بمشاعر البنات لازم يكون مخلص مع انسان متدين جدا وهو ده الاساس وسيبيكي خالص من كلام الناس دي لسه ما اتجوزتشي ليه يا اختي ياتري في ايه ده مفيش حد راضي يروحلها الكلام ده كله ارميه ورا دهرك عارفه ليه لان اكيد لما يخلصوا كلام عليكي لفتره قصيره هيكلموا بقيه اليوم عن التانيه اللي اتجوزت بدري او دلوقتي وجوزها مطلع عينيها ويبداو يحكوا علي المشاكل الللي بينهم .. طيب يا عم انا عرفت ان الموضوع صعب ولازم اتاني في الاختيار حتي لو هتجوز بعد عشر سنين اعمل ايه يعني علشان ابقي متانيه ؟..
هاقولك بصي اولا اوعي اوعي اوعي تدوري انتي علي الحب لا خلي الحب هو اللي يجيلك لغايه عندك ويكون حب مخلص غرضه الجواز مش شويه تسليه في الموبايل ودي مشكله كبيره طب ولما ييجي الحب اللي الغرض منه الجواز اعمل ايه ؟.. ساعتها ياختي هتكوني مش متعلقه بحد فهتختاري بدون ادني ضغوط وهتفكري بعقل ناضج طيب واختار ازاي ؟ بصي في بنات بتختار زوجها علي جماله والله وصدقوني عن تجارب شفتها هتندم اخر ندم هتفضل طوول الوقت في شك ياتري قابل مين ف الشغل ياتري راكب جمب مين ياتري مين سلم عليه ياتري مين بيبصله واقذر حاجه الشك بيتعب صاحبه جدا لدرجه انه ممكن ينهار نفسيا ولعلمك طالما الموضوع اتبني من الاول علي جمال اكيد مش انتي اجمل انسانه ولا هو اذن هيبقي في تغيير طال الوقت او قصر هيغير لان الجمال ده شئ جديد لما نتعود عليه خلاص هيحب يغير وخدي بالك ان الراجل لو اتعود علي مراته ومل منها وزهق من تكرار رؤيتها بنفس الصوره ما هو وهي اختاروا بعض علي الجمال الكفه يا خايبه هتبقي في صالحه لانه ممكن يغيرها انما انتي هتغيريه لا هتفضلي مستحمله وشاربه النكد .. وفي بنات تانيه بتختار زوجها علي فلوسه لا والله وعلي ايدي بردو والله ليذلك بفلوسه بردو طال الوقت او قصر في اول اختلاف في الرأي هيذلك بفلوسه ودي حاجه صعبه جدااا .. بص باه انت كده عقدتنا طب يا عم نختار ازاي ؟ لازم تختاريه علي اساس دينه لاسباب كتير لانه اكيد لما يكون متدين بجد هتكوني انتي كمان تدينتي الحاجه التانيه انه هيختارك علي اساس صح مش علي اساس شكلك لان الراجل اللي اختار علي اساس الشكل يادوب سنه ويتعود علي شكلك ويبدا باه نخوه الرجوله عنده تظهر يضربك مره يهينك مره علشان يحس انه راجل اما المتدين ده هيختارك علي اساس فطرتك وروحك واسلوبك ودوول عمرهم ما هيتغيره اذن عمر وجهه نظره اللي خدها عنك علي اساس الحاجات الثابته دي ما هتتغير وهيفضل يخلصك طوووول عمره وكفايه انه هايعملك بما يرضي الله ورسوله .. بجد موضوع الجواز ده صعب شويه مش عاوز اقولك انه زي ما بيقول البعض زي البطيخه لا ولا حاجه مكشوفه نتيجتها للجميع لا طبعا الحقيقه ان انتي اللي لو اختارتي صح النتيجه هتبقي متوقعه واوعي واوعي واوعي تجازفي بمستقبلك وتختاري حد علي اساس المجماله او كلام الناس او او او واوعي كمان تختاري حد انتي مش بتحبيه لان الحب هو عجل الحياه الزوجيه بجد ويكفي الجمله دي لازم تكوني بتحبيه بس حب من النوع اللي احنا اتفقنا عليه حب علي اساس مخلص ويكون هو اللي جايلك علي اساس جواز مش انتي اللي تروحيله و مش يكون علي اساس تسليه .. طيب ياعم فهمنا ايه المصلحه في العنوسه؟ المصلحه انك انتي دلوقتي مرتاحه وعقلك بينضج يديكي الفرصه انك تختاري صح وبعدين لو ربنا هيرزقك بحد مش كويس يبقي انتي دلوقتي عايشه ايام حلوه ومرتاحه ولو ربنا هيرزقك بحد كويس يبقي انتي مش خسرتي حاجه اديكي مرتاحه ومبسوطه حتي لو مش مرتاحه ربنا هيبقي ساعتها مقدرلك انك تعيشي الفتره دي كده .. واوعي تنسي اللي بيستعجل بي ايه بي ايه بيتكعبل .. يالا معلش صدعتكم وكل سنه وانتوا طيبين ..

يا سلام يا محمد اسمعوا كلام محمد يا بنات هو اصله كان شغال خاطبة كل حاجة يقول على ايدى هههههههههههه
بجد موضوع حلو يا محمد وانا معاك ان مش بحب جواز البنات الصغيرين برضو بس الخطا الاكبر بيرجع الى الاهل لانهم اذا بنتهم خدت الدبلوم بيبقوا عاوزين يتخلصوا منها وبيجوزها لاى واحد وخلاص وانا برضو عارف قصة بنت تزوجت بسن صغيرة وطلع عنيها فى الجواز ولحد الآن لسه مأثر عليها الجوازة دى لان اهلها غصبوا عليها وعلى رايك كده كده هتتجوز وشكرا

موضوع مهم ياشباب . حكاية جواز البنات بدري ممكن نعمل منه موضوع يكون عنوانه ( قول رايك)

يالا ياجماعة ورونا الهمة عايزين نعمل توعية حلوة للبنات , والذى عنده حكاية حلوة عن الموضوع ينزلها لينا

موضوع جميل وسبق واتكلمنا فيه وانا ما زلت عند رايى
انا مش مع الزواج المبكر للبنات لان البنت بتكون لسه مراهقة ومتهيالى متقدرش تمشى بيتها صح وبعدين ازاى بنت تكون عندها 18 سنة تبقى ست بيت وكمان معاها اطفال ومش هتعرف تتفاهم مع زوجها ولا اهل زوجها خصوصا حماتها ,انا من راي البنت تتجوز فى حدود 21 سنة كويس اوى

ايه يا محمد يا يوسف احنا عاوزين نجوز هههههههههه 21 سنة ايه

كلامك جميل ومقنع يا محمد .

حلوة "ومع اول عريس وأقلب" دي .

أنا رأيي ان عقلية البنت وطبيعتها هي اللي هتحدد إذا كانت تقدر تشيل
مسؤلية بيت وللا لأ
مش موضوع سن ..... يعني ممكن بنت سنها صغير بس تقدر تشيل المسؤلية
يبقى تتجوز صغيرة أحسن
والرك ع الأهل والأم بالذات ف الموضوع ده .

كلام جميل ياعمرو .كله عقلانية ...... واحب اطرح سؤال للاعضاء
س- هل السبب في الزواج المبكر شغف البنات أم تخفيف حمل عن الاسرة أم خوفمن العنوسة ؟

السبب فى الجواز اول حاجة الاهل لو البنت مثلا خدت الدبلوم بيبقوا عاوز يتخلصوا منها باى طريقة مش عارف ليه قال يعنى اما يجوزوها يبقوا كده زاحو هم كبير طب ممكن بتصرفك ده تجيب مشاكل كبيرة لبنتك وليك

كلامك تمام يا محمد بس مافيش بنت بتتزوج غصب عنها ... بمعنى ان البنات عايزة كده

ماشى يا استاذ اشرف بس البنت لما اهلها بيزنوا على ودنها فبتوافق لكن يا استاذ اشرف لسه بجد فى بنات اهلها بيغصبو عليها وده كلام اكديد وانا مستغرب اوى

اكيد البنات دول على درجة قليلة من التعليم والثقافة وعمرهم ما هيطلعوا جيل متعلم ..

يا استاذ اشرف هم متعلمين واهلم كويسين بس دماغهم ناشفة وفيها افكار غريبة شويتين مثل زواج القرايب والعيلات والكلام ده

الاراء الناشفة من الاهل اكيد نابعة من قلة وعى بالدين والعلم ........وما تنساش ان جواز الاقارب كله مشاكل ......
..... وربنا يهدى الجميع .....

كلامك خطير يا سكاى بس يعنى ايه بيكتبوا سن مزرو وبعد 5 سنين بيكتبوا كتب الكتاب بعد ما خلفت تصدق فكرة حلوة يعنى زى اوروبا وامريكا

كلامك كله مظبوط يا سكاى , وعلى فكرة الجواز صحيح شرعا وكتب الكتاب بعدها بكام سنة بيكون علشان حفظ الحقوق امام الحكومة فقط . لكن هسالك سؤال هم بيسجلوا اولادهم في الصحة ازاي بدون قسيمة زواج؟؟؟

طيب لو افترضنا ان الجواز ف سن صغير زي ما بتقولوا مش صح

ممكن تقدرو تحددوا السن اللي ما ينفعش البنت تتجوز قبله ؟؟؟؟؟؟؟

يعني مثلا لو واحدة عندها 17 سنة يبقى عادي ماشي .

طيب الباقي رأيهم السن يبقى كام ؟؟

مش قبل 18 ستة والافضل بعد العشرين

بعد العشرين افضل سن

أهو شفتو حتى انتوا اختلفتوا ف السن اللي بتعتبروا فيه البنت صغيرة ع الجواز
فما بالكم بقى بأم البنت دي أو البنت نفسها مثلا
ازاي ممكن تمنعها من انها تتجوز لو كانت عندها القدرة
على تحمل مسؤلية بيت بحجة ان سنها صغير

يعني بالنسبة لفتكات ممكن البنت تتجوز وهي عندها 16 سنة عادي
وبالنسبة للأستاذ أشرف ده يبقى مش عادي ولازم البنت تكمل 18 سنة ع الأقل
وبالنسبة ليوسف ولا ده ينفع ولا ده ينفع ولازم تكون عدت ال 20

وده بيدل على ان الموضوع مش موضوع سن
هو بيعتمد على طبيعة البنت وعقليتها وقدرتها على تحمل المسؤلية
وأكتر حد يقدر يحدد ده هو البنت نفسها وأهلها وخصوصا أمها
هو ده قصدي .

طيب يا سمون ..فيه بنت قادرة على تحمل المسئولية وعمرها اقل من 12 سنه وفيه ستات عندها فوق 40 سنه ولاتتحمل المسئولية. ................ يبقى معنى كلامك الاولى تتجوز والثانية ما ينفعش تتجوز ...... ارجو التوضيح

يا جماعة هتفرق ايه لو البنت فضلت فى بيت ابوها لحد سن العشرين يبقى اضمن ليها اما تتجوز فى سن اصغر من كده

كلامك ... زين ....زين ...زين ..... يا ابو يوسف

اقتباس :

طيب يا سمون ..فيه بنت قادرة على تحمل المسئولية وعمرها اقل من 12 سنهوفيه ستات عندها فوق 40 سنه ولاتتحمل المسئولية. ................ يبقىمعنى كلامك الاولى تتجوز والثانية ما ينفعش تتجوز ...... ارجو التوضيح

بالظبط كده يا أستاذ أشرف ده بالإضافة لطبيعتها وعقليتها زي ما قلت مش تحمل المسؤلية فقط .

اقتباس :

البنت مهما قدرت تتحمل المسئولية
مش هاتقدر تتحمل مسئولية بيت كامل

ماحنا نقصد ب المسؤلية دلوقتي مسؤلية البيت
يعني لو مش هتقدر تتحمل مسؤلية بيت يبقى ماتتجوزش
انما في ناس بتقدر تتحمل مسؤلية بيت ولسه سنها صغير يبقى ايه المانع ؟؟

طيب مانا باقول طبيعتها وعقليتها وقدرتها على تحمل المسؤلية
يعني لو حاجة من دول ناقصة يبقى ما تتجوزش
يعني لو عقليتها لسة صغيرة ماينفعش .

خلاصة الموضوع كلنا متفقين ان جواز البنت لازم يكون فى سن مناسبة يخليها تقدر تتحمل المسئولية وتحل مشاكلها بعقلانبة ... ومش هيتم الكلام ده الا لما البنت تكمل تعليمها وخصوصا الجامعى.. لانه يكسبها خبرات كثيرة

اقتباس :

خلاصة الموضوع كلنا متفقين ان جواز البنت لازم يكون فى سن مناسبة

صح كده تمام والسن المناسب ده بيختلف من بنت للتانية .

اكيد وبعدين ليه الاستعجال

قولى لنفسكوا يا اختى

انا مقدرش اقلب عليكى ده انت تبعى

انا على طول جدع