سياسة كيس الشيبسى فى اشتغالة المصريين

مساء الفل على شباب برشوم

جبتلكم النهارده حاجه كتبها احد الاعضاء فى احد المنتديات بس هتعجبكم قوى
كتب الآتى :

زمان اول ما دخلت المدرسة سنة 85 كنت باخد مصروفى اليومى 10 قروش وكنت بشترى سندويتشين بيهم بس سندويتشات بتاعت زمان بقى العيش الفينو وطعامته ( الله يرحمه ) قولو امين

اخترعولنا اختراع جديد لاول مرة فى مصر وهو الشيبسى
كان الشيبسى اول ما نزل الكيس ب 15 قرش وكان بطعم الملح بس

بعدها بحوالى سنة طلعولنا اختراع تانى وهو شيبسى بطعم جديد وتوالت الانواع وكان اى نوع باى طعم ب 20 قرش ماعدا الملح كان ب 15

بعدين اتلغى بتاع الملح دا وبقى الكل ب 20

وفجأة طلع كيس اكبر ب 25 قرش

بس ابو 20 كان لسه موجود

بس لقيته بيصغر وكان حد دعى عليه انه يتسخط
وفضل يصغر يصغر لحد ما اختفى وبقى كله ب 25 قرش

الغريبة ان التجربة دى مكنيتش بتتكرر فى الشيبسى بس

الحاجه الساقعة برضو كانو بيعملو فيها كدا
كانو يصغروها ويطلعو جنبها حجم اكبر شوية بسعر اغلى تقوم الناس تاخد الاكبر وتسيب الصغيرة لانها كانت بتتسخط قوى

فهمت اللعبة وانا صغير قوى

وعرفت انهم بيضحكو علينا علشان يغلو الاسعار بالحداقة

واكتشفت بعد كدا ان الحداقة دى فى حاجات كتير قوى

وانك لو عاوز توصل وتبقى غنى لازم تبقى حدق

بس الى مابيفهمش بيبقى غبى

وتقريبا السياسة دى الشعب المصرى كله فاهمها وهارشها

بس ليه بيبلعوها بمزاجهم مش عارف
احمد عز فهم اللعبة دى

وخلى طن الحديد تمنه اكتر من 6000 جنيه بالرغم من انه فى كل العالم ب 3500 بس

ولما اتسال قال الاسعار العالمية

ولما اتحط فى موقف محرج وعرضت احدى الشركات العالمية انها تورد الحديد لمصر ب 3500 قال انا هستوردلكم الحديد

واتفاجئنا بالحديد المستورد دخل مصر بسعر اغلى من المحلى

فلما سالنا قال اصل الحديد المستورد لما ضفنا عليه سعر الشحن بقى كدا

بصراحه راجل فاهم اللعبة صح مش بس كدا لا وطورها كمان

برافو يا عز قدرت تشتغل نفسك بس خسران حب الناس

بس الى مافهمهاش صح صحفى زى سمير رجب

حب يغلى اسعار الجرايد فحاول يلعب نفس اللعبة

فقال ان الصحافة فى العالم كله بتتطور ماعدا عندنا واحنا علشان نطور نفسنا هنشترى مطبعة عملاقة ونخلى الجرايد كلها من اول صفحة للاخيرة بالالوان

وفجأة الاسعار غليت بتاعت الجرايد وبقيت بالالوان

بعدها بكام يوم رجعت ريما لعادتها القديمة وبقيت اسود من السنة السودا

من كام يوم طلع سمير رجب وقال ان الشعب من حقه يعبر عن رأيه ولما حصلت المظاهرات بتاعت المحلة قال ان المتظاهرين هيواجهو تهم التجمهر والتخريب ومحاولة قلب نظام الحكم

بيحاول يلعب نفس اللعبة بس مش فاهم انها اتهرشت من زمان قوى

الغريبة ان اللعبة دى مهروشة فى الخارج كمان
يعنى لما جات الحكومة تلعبها على امريكا والجرايد الحكومية شتمت السياسة الامريكية استفسرالرئيس الامريكى عن الى بيتكتب دا فكان الرد احنا عندنا حرية تعبير زى عندكم بالظبط

طبعا على مين دا مبروم على مبروم مايلفش

الرئيس الامريكى هدد بقطع المعونات ففجأة اتحول الهجوم على امريكا الى المدح فى العلاقات المصرية الامريكية

خد من دا كتير بقى

تصريحات بان جمال مبارك مش هيكون رئيس مصر القادم بالرغم من انه اصبح مسيطر على الحزب الوطنى

محاولة اغلاق لموقع الفيس بوك فى مصر لانه بيقدم اشياء ضد الحكومة وكذلك اليوتيوب

ومحاولات كتير قوى من النوع دا

يعنى الديمقراطية لها انياب من حقك تتكلم ومن حقى اعتقلك

عندنا ديمقراطية بس انت بتسىء استخدام حرية التعبير فى اهانة الشرفاء

بصراحه مش عارف انياب الديمقراطية الوحيدة الى فى مصر فضلت تكبر مع ان كل حاجه عماله تصغر وتتسخط

وفضلت تكبر وتكبر لحد ما بقيت اكبر من الديمقراطية نفسها

اشتغالة السياسة واشتغالة الاقتصاد واحده مافيش فرق بينهم لو تلاحظو

بس نفسى افهم

سياسة كيس الشيبسى مش ناوية تنتهى من مصر ؟

سياسة عقيمة بس مافيش مخرج منها

الكل فاهمها بس مش عارف يعمل ايه علشان ما تتلعبش عليه

يا ترى ايه الحل والناس مغلوبة على امرها كدا

هل السياسة دى فعلا موجودة فى مصر ولا انا غلطان ؟

هو احنا سلبيين ولا اتحطينا فى خانه اليك ومش هنطلع منها

تفتكرو ايه الحل فى وجهة نظركم

فى انتظار وجهات نظركم

ربنا ينتقم من الناس اللى وكلاها والعه وسايبه الغلابه ياكلو ف بعض

كل اللى نقدر نقوله هو حسبنا الله ونعم الوكيل

وربنا يرزقنا بواحد بس صالح يمسك زمام الأمور
مع إنى مش شايف أى حد صالح فى البلد دى ينفع يمسك كانتين حتى
مش رئاسة جمهورية!!!!!!!!

والله انا نفسى دلوقتى تتطبق الشريعة الاسلامية فى مصر

يا عم بشير الشعب المصر مجبر على قبول هذه السياسة يعنى مثلا لو مشترتش حديد عز امال هتشترى حديد منين يعنى مش هتبنى؟ ادى حاجة واللى يقول فى حرية فى البلد يبقى بيضحك على نفسه.والبلد دى عاوزة ثورة

ثورة فعلا فكرة حلوة

أنا مش شايف للموضوع ده حل خالص لإنك مش ممكن
تلاقي الراجل الكامل اللي يرضي الناس كلها
وتمسكه الحكم ....
أنا بدأت اؤمن ان السياسة دي مجال مستحيل النجاح فيه
ومهما عملت فيها مش هتعجب كل الناس برده !

اقتباس :: أنا مش شايف للموضوع ده حل خالص لإنك مش ممكن
تلاقي الراجل الكامل اللي يرضي الناس كلها
وتمسكه الحكم ....
أنا بدأت اؤمن ان السياسة دي مجال مستحيل النجاح فيه
ومهما عملت فيها مش هتعجب كل الناس برده !

عندك حق
انك ترضى كل الناس فعلا صح لان كل واحد وله اكيد ظروفه وبيتكلم عن اللى بيحصله
بس طالما قبلت انك تبقى حامى حما الناس دى كلها تبقى اد المسؤوليه على الاقل
والحامى هو الله
مش تبقى واكل مال الناس وتقولى بحميهم
مش تبقى بتاجر باموال التامين ف البورصه وتقولى بحميهم
يعنى متبقاش ف الاخر حاميها حراميه
واذا كان رب البيت بالدف ضارب ف شيمه اهل البيت الرقص
ربنا ياخد بردو الناس اللى واكلينها والعه وسايبه الناس الغلابه تاكل ف بعضها

يا رب ياخويا يا رب

بس المشكلة ان ربنا هياخدهم وهييجي غيرهم زيهم برده وممكن يكونو أوحش !

ربنا يستر يا سموان

بيحمو أيه قصدك مش بيحموهم قصدك بيكلوهم

والله اللي بيعامل ربنا قبل مايعامل الناس ربنا هينصره ويكون جنبه

يعني لو واحد مسك الرئاسه وانا من المؤيدين وبشده البرادعي
وعامل ربنا وحس بالناس اللي عايشه تحت خط الفقر اكيد هينجح مش شرط نجاح كامل لاني مش ف انسان كامل
والكمال لله

املنا ف التغيييييييييييييييييييييييييييييييييييييييير

هو كلامكم صح بس اين الفعل
نحنوا اقوال لا افعال
صحيح بنكلم بس اين الفعل وعجبى وياريت تقراءوا الموضوع الى انا هحطه دلوقتى

» من هم المصريين؟
» المصريين اهم